close
«Divertia» nun nos divierte

«Divertia» nun nos divierte

2017-03-24666Visitas

Nun soi a atalantar mui bien pa qué sirve eso de «Divertia». Sí, yá sé que se trata d’una empresa municipal que s’encarga de cultura, festexos, turismu y otres mandangues al rodiu d’ello, lo que quiero dicir ye que nun-y veo un sentíu a la cosa. Nuna ciudá como Xixón, que nun ye Nueva York, tenemos yá una conceyalía de «Educación y Cultura», al mandu de doña Montserrat López Moro y «sus boys», y tenemos otra conceyalía de «Turismo, Deportes, Festejos y Juventud», a cargu de don Jesús Martínez Salvador y los suyos. Amás d’ello, funciona tamién una «Fundación Municipal de Cultura, Educación y UP», colos sos propios cargos y participación de toles fuerces municipales, y un «Patronato Deportivo Municipal» tamién col so organigrama propiu. Y un, o seya yo, que ta un poco fartu de les perres que se gasten provinientes de los nuesos bolsos, diz inxenuamente: «¿Oiga, nun ye de sobra con too esto pa xestionar les cuatro coses que se faen na nuestra ciudá?». «¿Qué sentíu tien crear esi otru «mamotretu» pa duplicar les mesmes funciones yá axudicaes a otros organismos? Nengunu. En llugar de simplificar burocracia, eliminando duplicidaes, lo que se fai  ye lo contrario, siguir creando entes que nun son necesarios pa gastar perres y xestionar peor.

Agora’l «mamotretu» echa les cuentes y enterámonos de que l’Ayuntamientu ( o seya nosotros) tuvo d’apochinar en  primer instancia 7 millones d’euros, en segunda  una estraordinaria de 278.000, y en tercera otra más estraordinaria de 1.054.000. El Déficit del añu anterior, 2015 fue, según LNE, de 8,8 millones. Dizse qu’hubo aforru. Yo non lu veo la verdá. Y dizse tamién -dizlo Foro- que pese a esi supuestu aforru ello «no supuso  ninguna merma en la actividad llevada a cabo». Lo cual nun ye n’absoluto verdá porque tovía ta caliente’l cadaver de la International Opera Studio a la que, por rebaxa-y les ayudes de de 50.000 a 15.000 euros, tuvieron que marchar de la ciudá, eso por poner un exemplu reciente.

Ocurre lo que suel ocurrir nestos casos: que’l dineru presupuestáu pa coses culturales queda, mayormente, pa financiar a los funcionarios que lo lleven. Yo pienso que d’un presupuestu de, por exemplu, mil euros, deberíen empobinase pa coses culturales 900 y los otros 100 pa la xente que los organiza, pero abúltame que la proporción ye la inversa: queden 100 pa la cultura y 900 pa los encargaos de facelo. Pamidea, esa Divertia va a acabar subcontratando, si non lo fai ya, con otres entidaes festivo-culturales pa que faigan les coses, y asina, de «mamotretu en mamotretu», cada vuelta gástase más en facer menos coses. La famosa teoría de la pirámide invertida de Xuan Pintueles. Pues, sinceramente, a min eso de Divertia nun me divierte nada.