Yá va tiempu que vienen con esi «pali-pali» del copagu. Primero mui seliquino, tirando la piedra y furtando la mano. Falando con medies pallabras. Sí pero non. Rúxese pero desmiéntese…. Pero agora yá principien a sacar l’artillería pesada y sacudí-y a tolo que se mueve: los responsables de Sanidá dícenlo yá ensin rodeos: Los pacientes (¡y tan pacientes!) tienen que s’involucrar tamién nel funcionamientu la sanidá. Hai que pagar una parte los servicios. Lo mesmo nos diz la conseyera de Bienestar y Asuntos Sociales, Noemi Martín: pa caltener a les persones dependientes vamos tener que crear el copagu, los ciudadanos tienen tamién de pagar una parte de los servicios. Y hasta l'»alcaldable» xixonés del PSOE, Santiago Martínez, diznos que nel tresporte públicu vamos tener que poner toos «el güevu» (él díxolo más fino, pero pal casu «pataques»).
Dicho asina,paez que los distintos organismos del Estáu, Ayuntamientos, Comunidaes Autónomes, el propiu Gobiernu Central… tienen unes perres que son suyes y que, graciosamente, empleguen en determinaos servicios que nos faen. Una especie de ONG «grandona» que tien un capital propiu qu’invierte en nós pa facenos la vida meyor. Y como agora la vida ta mui cara y les sos perres nun-yos lleguen, dícennos que yá ta bien, que tamién nosotros tenemos qu’axudalos a pagar toes eses coses que nos vienen dando, paez ser que por caridá.
Pero bono, ¡qué broma ye esa! ¿D’ónde salen les perres de los Ayuntamientos? ¿D’ónde salen les de les Comunidaes Autónomes? ¿D’ónde les del Gobiernu Central? ¿Quién ta pagando daveres tolos servicios qu’esfrutamos? ¿Y les carreteres? ¿Y l’exércitu? ¿Y los sueldos de los políticos y de los funcionarios? ¿Acasu «ellos» tienen unes perres propies qu’innvierten en nós? Ta claro que non. Somos nosotros, los ciudadanos, los que YA TAMOS PAGANDO LA SANIDÁ, Y LOS SERVICIOS SOCIALES, Y LOS TRESPORTES PÚBLICOS. Y si les perres nun lleguen, que se nos diga qu’hai que xubir los impuestos direutos, o les tases, o los impuestos indereutos, o l’IVA o el VENIVA, pero que nun se nos trate como a subnormales. Nun ye qu’ellos paguen una parte y nosostros debamos pagar otra: ¡pagámoslo too nosotros! O seya que yá ta bien d’amenacianos como si fuéremos neños malos que queremos escaqueanos. Toles perres que manexen los poderes públicos son nuestres, y lo que facemos cada cuatro años cuando metemos una papelina na urna, ye escoyer a unos o otros PA QUE NOS ADMINISTREN LES NUESTRES PERRES. Y si nun nos presta cómo lo faen, pues yá lo saben ¡puerta! Asina que dicho queda nel títulu. Lo del copagu nun dexa de ser un «cuentu cagáu». Pagámoslo too nosotros, ellos nun paguen nada. Nun esiste’l «copagu».
