close
El «Dindurra» como síntoma

El «Dindurra» como síntoma

2013-11-22CiudaesDindurra439Visitas

Dindurra 3Lleo n’El Comercio un titular d’unes declaraciones de l’alcaldesa de Xixón, señora Moriyón, onde se diz: «Tenemos más problemas que el cierre del Café Dindurra». La mio reflexón ye que sí, que seguro que la señora Moriyón y l’Ayuntamientu, y los partíos políticos tienen problemes más importantes que’l zarru d’un café vieyu. Y amás podíen retafilánoslos: la ZALIA, el nuevu PGOU, los accesos al Muselón, lo de les víes, lo del metrutrén y nun se cuantes histories más coles que nos castiguen tolos díes. Agora bien, pa eso que se llama «el ciudadanu de a pie», igual el zarru del «Dindurra» ye más importante que toos esos otros problemes de l’alcaldesa. Y ye que, nel fondu, lo que se ta xugando, non sólo col tema del «Dindu», claro, ye cómo queremos que seya la nuestra ciudá.

Ún observa, y nun hai que ser mui llistu pa ello, que les ciudaes ca día se paecen más unes a otres. Que se tán uniformizando a pasos de xigante. Damos una vuelta peles sos cais y vemos los mesmos comercios, les mesmes franquicies: Zara, Stradivarius, El Corte Inglés, Sfera… El café di Roma. Podíemos pensar que tamos nun mesmu sitiu, quitando qu’unes cais tean en cuesta y otres en llano. Los centros comerciales y los supermercaos grandonos nes afueres, pa tener que garrar el coche y desplazanos hasta ellí, a tomar les mesmes hamburgueses en MacDonalds o Burguer King. Talo que si tuviéremos en Los Angeles de EE.XX. En tolos sitios igual.

Ensin embargu, yo creo qu’hai que lluchar por preservar el calter propiu de cada ciudá, el so espíritu, la so personalidá. Les ciudaes, como les persones, son distintes y hai unes señes d’identidá que les conformen. Un día un alcalde pue pensar que ye más rentable tirar la Escalerona y poner ellí una rampa, o facer una carretera pel mediu del Parque d’Isabela pa llegar primero a Cabueñes. Si hubiere qu’escoyer, ¿qué ye antes, la playa o’l Muselón? Nun sé si m’esplico. Hai coses que nun se puen medir pola importancia absoluta que tienen: ¿qué ye que zarre un café vieyu…? Sinón pola so importancia relativa. El vieyu cafetón «Dindurra» ye parte consustancial de la fisonomía y del espíritu de Xixón. Querámoslo o non, ye parte de les señes d’identidá de la nuestra ciudá. Unes señes poles qu’habría de mirase a nu ser que queramos vivir, nun futuru non mui alloñáu, nun sitiu que nun reconoceremos como nuestru. Nuna ciudá uniforme, despersonalizada. Eso ye, al mio xuiciu, lo que se ta xugando nesti momentu. Abúltame que ye un problema más importante qu’esos otros que tanto-y esmolecen a la nuestra alcaldesa.