Los caberos acontecimientos nel Sahara Occidental tán amosando, otra vuelta más, el calter antidemocráticu y belicista del nuestru vecín del sur. Primero fue la muerte a tiros d’un rapaz que, xunto cola familia, pretendía entrar nel campamentu d’ El Aaiúm, muerte entá nun esclariada, y más recién la destruición, manu militari, d’esi mesmu campamentu, apináu de neños, muyeres y ancianos. Una xente que lo que pidía, hai que lo recordar, nun yeren derechos «políticos» (que tamién podríen facelo), sinón derechos sociales: trabayu, viviendes… Marruecos, enantes de que la situación s’enquistare, tiró pela cai del mediu y arrasó’l campamentu. Les imáxenes de la televisión meten mieu. Fálase de 19 muertos y cientos de feríos.
Da la impresión de que’l gobiernu español, a la vista los acontecimientos, debiere dicir dalgo. Como país colonizador, ocupante del Sahara Occidental a lo llargo de munchos años, tien una responsabilidá pa con esi territoriu y pa con eses persones. Igual qu’un empresariu nun pue pegar un portazu, zarrar la empresa y dexar a los trabayadores na cai (anque tamién avece a facelo), un país, qu’impuso unes lleis, esplotó unos recursos y organizó, del mou que meyor y petó, una sociedá, nun pue colar diciendo: «Ta llueu, Lluques». Eso ye muncho peor que lo del famosu Pilatos, qu’a fin de cuentes la cosa nun diba con él.
Y ye que, amás, les repetíes declaraciones de la ministra d’Asuntos Esteriores d’España, Trinidad Jimenez, nun solo pretende llavase les manes, sinón que fai la inxusticia de poner nel mesmu planu al poderosu qu’al débil, al atacante qu’al atacáu, al illegal qu’al llegal. La so frase favorita ye: «Hai que procurar que les partes se entiendan». ¿Qué partes? ¿De qué tamos falando? ¿Pue ponese na mesma balanza a un Estáu, con una organización, unos aliaos, un exércitu, y un aparatu represor, y a un pueblu ensin recursos, ensin tierra propia porque-yos la tán arrempuñando, viviendo en condiciones miserables, col únicu equipaxe de tener la razón con ellos? Nun hai mayor inxusticia que poner nel mesmu planu a dos desiguales, másime cuando ún tien la razón y otru non.
La comedia «bufa», sinón fuere traxedia, de lo que pasó con Aminatu Haidar va unos meses yá tenía que tenenos preparaos pal futuru. Pero la cobardía de lo que se ta faciendo, por parte del Gobiernu Español, col pueblu saharahui nun tien nome. O sí que lu tien, pero ye mui féu d’escribir. Y una cabera reflexón que sé que naide comparte. L’anterior Ministru d’Esteriores español, Miguel Ángel Moratinos (bautizáu pola «derechona» como Desatinos) tenía munchu mayor altor políticu que Trinidad Jimenez y yera un verdaderu especialista, tanto nel tema del Oriente Mediu, como nel del Sahara. Otra cosa ye que nunca nun pudo facer nada porque’l que manda, manda. Agora que yá nun tien nengún cargu nel gobiernu, acaben de llamalu urxentemente a Arxel como mediador nel conflictu. Mentanto, la señora Jimenez ta, nel momentu que yo escribo, dando una vuelta per Ecuador. Pues val.
