Cuando un ve pela tele, o en dalguna semeya periodística, a esos bárbaros derrompiendo monumentos, saqueando museos, devastando ciudaes enteres calificaes como Patrimoniu de la Humanidá, siente una roxura lloca y una gana tremenda de face-yos a los autores lo mesmo qu’ellos faen con esos tesoros inigualables. Y, ensin embargu, qué podía esperase d’esa xentuza que yá dio amueses sobraes de la so barbarie. Porque de bárbaros ye desfacer una obra d’arte qu’otros homes, notres dómines, compusieron como escatafinos de civilidá, de progresu. Pero muncho más bárbaro, cruel y desalmao ye asesinar a seres indefensos delantre una cámara televisión. Grabándolo pa que quede’l rastru de la so inhumanidá, pa que les xeneraciones vinientes puedan dicir, al contemplalo: «Mira, hasta esi finxu pue algamar la maldá d’un supuestu ser humanu».
Porque los atentaos culturales son crímenes culturales, pero son entovía muncho peores los atentaos físicos que dexen crímenes físicos, de los daveres, porque nesti mundu lo más irreparable de too ye la perda d’un ser humanu. La perda y lo que conlleva toa esa llocura. Habría de buscase un nuevu nome pa esa carroña, porque conferi-yos la categoría de «Estáu Islámicu» ye integralos de dalgún mou no que nun ye sinón un mediu civilizáu d’agrupase. Un estáu ye un conxuntu de persones que se dan a sí mesmes una forma xurídico-política de convivencia. Pa elles y pa los de fuera. Y esta banda d’asesinos nun algamen la categoría de poder llamase «estáu», por esi calter de civilización que supón. Llamémoslos «horda», o inventemos una nueva pallabra que los defina como lo que son. Unes alimañes.
La guerra qu’estos innomables tán promoviendo algama yá -según datos de les Naciones Xuníes- 200.000 muertos, 7,6 millones de desplazaos internos, que fuxen del so terror, y 3.000.000 de refuxaos nos paises vecinos. Nun sé qué responsabilidá tien en tou esti asuntu’l llamáu mundu llibre, los paises civilizaos, pero de xuro que la tien. Diz un refrán mui esplícitu que: «unu mata y otru estira pela pata». Porque si la xente y los paises que daveres son civilizaos quixeren acabar con ellos nun tendríen problema. Nin siquier faltaría dir a tira-yos bombes. Abastaría con aisllalos. Porque hai dalguién que-yos compra esi petroleu que saquen en Siria y en Irak. Y hai dalguién que-yos vende les armes coles que maten. Si los estaos se comprometieren a nun compra-yos el petroleu, tendríen que bebelo ellos. Y si nun-yos vendieren armes y municiones, tendríen que tirar con gomeros. O seya que dalgún otru responsable hai. En fin, tamos creando un mundu pa los nuestros fíos qu’un día s’estudiará nes universidaes como lo que nunca debió facese. Bueno, eso nel casu de que nel futuru sigan esistiendo universidaes.
