Llégame l’anuncia de la muerte de Felipe Prieto na casina de Pión, un paraísu braniegu pero… ensin conexión a internet. Eso ye la bono y lo malo que tien, desconectes de cuasi too pero, dacuando, prestaríate tar más conectáu. En fin, ellí nun llega esa maravía qu’anunciaTelecable de wifi en tol universu asturianu.
Pero lo importante, lo tráxicamente importante, ye’l fallecimientu d’un rapaz de setenta y pocos años (caltengo lo de rapaz) que, al dicir de tolos que lu conocieron, yera una bona persona. Queda dicho, pues, que yo nun tuvi esi placer. El mio conocimientu de Prieto ye dende fuera, y dende ehí ye dende puedo dar una impresión personal.
Felipe Prieto tenía esa pinta d’ogru bonu o bonachón, que suelen dar la barba, una cierta centura amplia y esi aire de “bonhomía” que nun se sabe mui bien en qué consiste. Siempres me recordaba a otru queríu amigu, Nel Amaro, anque’l so carauter paecía ser muncho diferente: Nel, mui estrovertíu y Felipe más reconcentráu.
Dexa, Prieto, una bona herencia, porque les coses nun hai que les mirar pola cantidá, sinón por otros valires más fondos. Asina, namás nos dexa, a los llectores asturianos n’asturianu, un pequeñu poemariu –“Esbilla”- apaecíu nos primerísimos años del Surdimientu. Y, ensin embargu, hai una cierta unanimidá (non agora que morrió, sinón en vida d’él) de que ye un poemariu mui guapu y que supón un rompimientu (claro que d’aquella tolo que se facía yera rompimientu) colo anterior. Una poesía popular, sofitada nel mundu rural, pero qu’aportaba otres munches coses a aquel “ruralismu” patagüeyu y señaldosu d’autores más vieyos. Ensin escaecer que tamién los hubo bonos, claro ta. Pero lo raro vieno depués. Un silenciu d’años. Un silenciu, al mio xuiciu, inesplicable. Como si ya tuviere dicho tolo que quería dicir. Abellugáu n’otros trabayos artesanales o intelectuales, nun recuerdo que participare col restu de los que d’aquella intentábemos lluchar pol “Bable”, espardelu, dignificalu. Él dexó’l so mensaxe de náufragu na botella, y esmucióse d’esi mundu nel que tan bien principiara. De xuro que tien una desplicación, yo nunca-y l’alcontré.
Muerre, agora, Felipe Prieto y yá nunca podré entrugá-ylo. Quiciás otros, más cercanos, más amigos, lo sepan. Prestaríame que lo dixeren. En cualquier casu, él fizo muncho más que, seguro, otros qu’andamos emborronando cuartielles o dando la vara per internet. Habrá que volver a lleer “Esbilla” pa congracianos con elli. Que la tierra-y sea leve a Felipe Prieto.
