O seya, eso: un xaréu de la monda na fracasada investidura de don Pedro Sánchez el, n’otru tiempu llamáu, «okupa» de la Moncloa. Y ye que, ente’l dolcu y la media manga, toos quedamos un poco «compuestos y ensin noviu». Yá sé que ye una fatada tratar de dicir dalgo nuevo en tou esti enguedeyu, porque esi políticu que toos llevamos dientro, y tertulianos, telediarios y redes más o menos sociales yá dieron la so opinión. Toes distintes, claro. Pero, como siempre, yo tamién quiero pedir la pallabra y, claro, dó-ymela.
Coses al mio xuiciu clares: 1) el PSOE nun tenía nenguna intención de facer un gobiernu de coalición. La xugada de Pablín Iglesies echándose pa un llau dexólos descolocaos. 2) A la fuercia, entós, y pa salvar la cara y el culo (la cara ante l’afición, el culo ante’l númberu de los votos) concéde-yos una Vicepresidencia y otros tres ministerios a les Xuníes que Pueden. Una buena baza. 3) Refalfiu total nes files que Pueden. Nun acepten. Como diz l’otru: «qué quedrán». Pues paez que queríen más, y más, y muncho más, que dicía una canción vieya. Deben vivir nun mundu paralelu si piensen que los socialistes diben a da-yos más qu’eso. Total, que los ponen escontra la paré, la paré esbarrumba y van toos a tomar… vientos. Podría facese peor entrenándose un poco.
A min, de too esto lo que m’asombra ye que se puedan pedir y/o ofrecer ministerios ensin antes ponese d’alcuerdu en lo que se quier facer dende esi ministeriu. Eso que se llamen «los conteníos». Verbi gracia, póngote a ti de ministru de trabayu pero nun discutimos si hai que quitar la Reforma Llaboral del PP o non. O si quitamos un cachu, o dos, o tres. ¿Qué ye, que los ministerios son autónomos? ¿El gobiernu nun ye una cosa colexada onde, amás, el que manda ye’l señor Presi? ¿Pue facer caún la guerra pola so cuenta anque nun seya’l ministru de Defensa? Les Xuníes que Pueden nun pretendíen formar parte del gobiernu, pretendíen la toma de la Bastilla y el PSOE dixo que pa facese l’Harakiri hai que ser xaponés.
A min el que más me prestó fue’l vascu. Mui panchu, colos sos seis escañinos, aprovechó como siempre pa pedir coses pal so País. Como tien de ser. Y llueu, el «mudu» que nos gobernó siete años y nos dexó a la cola d’España (véase la prensa diaria) arremete escontra los nacionalismos. Pues yo quiero que quien me represente cante les cuarenta y les diez d’últimes al Presidente del Gobiernu en defensa de lo nuestro, y si eso ye ser nacionalista, que m’apunten. En fin, ente tanta medianía y tanta falta d’estratexa hasta esi Rufián paecía premiu Nóbel. Bueno, y déxolo equí que me xube la tensión y llueu ríñeme’l mélicu. Otru día más, que la cosa da pa muncho y lo que te rondaré morena.
