Principia l’añu y con elli les xubíes. Les de los precios, claro, porque yá nos dixeron que’l salariu mínimu interprofesional queda otra vuelta conxeláu (y van…) y lo de los xubilaos ye de xulgáu de guardia porque siguen perdiendo poder alquisitivu. Sí, ho, esi tema que suponía «una linea roja que no se iba a traspasar». Ja, ja… Como pa fiate d’ellos. Pero la xuba que más clama’l cielu ye la del recibu la lluz. El pifostio esi que tienen montáu col tema de les ellétriques nun s’entiende. Y nun ye que nun lu entienda yo, que puedo ser mui tochu, ye que nun hai cristianu que lu entienda. Paez una tomadura pelo. Porque ¿cómo ye eso de que faigan trampa nuna subasta que ye la qu’afita los precios de mercáu y nun «rueden cabeces». ¿Pero en qué país de chepos tamos? Si yo tengo una enquivocación con Facienda, por poner un exemplu, mándenme a casa a la Guardia Civil, y tiénenme pagando hasta l’añu’l Xuiciu Final. O quítenme’l paru, la subvención o lo que tea cobrando si ye que cobro dalgo. Y a estos de les compañies ellétriques, depués de pillalos trampiando, lo único que-yos faen ye rectifica-yos el preciu y acabóse. Y la CEE, tan rápida pa otres coses, nun diz un res anque se trate d’un atentáu escontra la competencia de millones d’euros. ¿Siempre paguen los mesmos? (entruga retórica, claro)
Pero ye que, amás, el propiu recibu de la lluz paez más bien un «empapiellu» («El que nunca tuvo en Casu/ nin de Casu comió’l quesu/ ye señal que nun fai casu/ nin comió del meyor quesu»), porque n’él, amás de lo que realmente consumimos (nel que se sumen los gastos de xenerar la enerxía, el tresporte y la distribuición) figuren: lo que pagamos pa lo de les enerxíes renovables (que ye un cuentu cagáu superinfláu), les subvenciones pa lo del carbón nacional, pa facilitar el suministru a les Islles Canaries, pal llamáu «déficit tarifariu», los impuestos ellétricos y l’IVA, una cosa que se llama «potencia contratada», que pagamos tolos meses namás por dicir que tenemos tal o cuál, y hasta unos contadores obsoletos que pagamos nosotros pa que los miren ellos. ¡Con esto nun hai quién pueda, ho! Somos el tercer país que más paga d’Europa pol usu de la elletricidá. Equí si qu’habría qu’aplicar la famosa fras de don Antonio Maura que, nel Parllamentu, sólo pidía pa gobernar «lluz y taquígrafos», o dicho d’otru mou, claridá y que se tome nota. Pero equí ta too más escuro que nel tunel del Negrón y a los taquígrafos deben tar faciéndo-yos un ERE. Empezamos bien.
