«El Corte Inglés» salúdanos toles Primaveres, acompáñanos nos branos, aconséyanos na Seronda y festéxanos les Navidaes y esa fiesta tan suañada pelos neños de los Reis Magos. En resume, vela por nos tol añu. «El Corte Inglés», xunto con otres cuantes empreses españoles ya internacionales, mentanto gasta tantes perres en metese nes nuestres cases y nes nuestres vides, permite que na so «retaguardia», como una cloaca d’inmundicia, seres humanos trabayen pa ella nunes condiciones ínfimes, por unos sueldos de fame. Esa ye la otra cara d’un capitalismu fedorientu que nun aveza a salir nos papeles, nin se dexa fotografiar en revistes de glamour, como vemos dacuando a los dueños d’Inditex, que presumen de ser unos de los más ricos del mundu. Ya sabes, Inditex: Zara, Pull & Bear, Massimo Dutti, Bershka, Stradivarius, Uterqüe… Ehí, onde mercamos tolos díes, que nos presta muncho polo baratos que son.
Pa qu’estos sinvergüences seyan baratos, y pa que-yos dean a ganar tantos millones pa poder salir na revista «Forbes», na «trestienda» de los sos negocios tienen trabayando en rexime de semi-esclavitú a homes y muyeres invisibles. Que namás se visualicen cuando hai dalguna catástrofe como la qu’acaba asoceder. L’espectáculu del edificiu ardiendo en Bangladesh, nel que morrieron mil ciento ventisiete trabayadores, que nun guardaba nin les más mínimes normes de seguridá, habría que pasa-ylu nun vidiu a los propietarios d’eses empreses a toes hores, al igual que na estupenda película de Kubrick, «La naranja mecánica» poníen-y al gran Malcolm McDowell toes aquelles escenes violentes pa, d’esi mou, quitá-y la violencia qu’él llevaba dientro. Sería un bon métodu pa que nunca inxamás tuvieren a los trabayadores neses condiciones llacerioses.
Nun sé que se podría facer pa finar con tanta desvergüenza y tantu delincuente. Los Estaos, claro, deberín tomar cartes
nel asuntu y prohibir de dalguna manera eso de la «desllocalización». Si usté quier vender n’España, hai que dar trabayu n’España y nunes condiciones dignes. Si la so ubicación ye en Bangladesh, pues venda usté ellí n’aquel mercáu, pero cola prohibición de facelo fuera, porque eso ye competencia deslleal pa los empresarios que cumplen toles normatives. Nun creo que fuera mui difícil de facer… si hubiere ganes. Pero tal y como ta’l capitalismu d’agora, eso ye una utopía. Esti día aconceyáronse unos cuantos d’esos «tiburones» de los negocios (nin siquier tuvieron toos) pa ver de disimular un poco tanta caradura y tantu llatrociniu. Paez que llegaron al alcuerdu de que, de xemes en cuando, hai que revisar les inmundicies y da-yos una vuelta cola «triente». Nun vayan repitise coses como estes que dan mui mala imaxe. Pero la cosa queda ehí. De salarios dignos, condiciones llaborales dignes, sindicación, etc. ná de ná. Nun vaya a ser que s’acostumen. La única solución dafechu sedría que se resintieren los sos bolsiellos, o seya, dexar de compra-yos. Face-yos el boicot. Entamar una campaña escontra «El Corte Inglés», Zara, etc. hasta obligalos a meyorar esa situación. Pero tamos tan sapozaos nel consumismu que fáiseme del too imposible de llograr. Anque tengamos pa ello na menos que «mil ciento ventisiete» razones.
