MORRIÓ PELTÓ.- Llamábase José María Pelaez Prieto, pero toos lu llamaben Peltó. Conocilu siendo yo mui neñu, cuando diba colos amigos a la Llucha Llibre que se facía nel Continental, mui cerque del Campu La Florida y del Corazón de María. D’aquella nos cartelos escribía’l so nome como «Peltop», terminao en p, y llevaba’l nomatu de «Cabeza de Hierro», porque utilizaba la tiesta pa desfacese de los sos rivales. La imaxinación xuvenil esnalaba diciendo que tenía dos güesos frontales, o que tenía una placa d’aceru dientro la cabeza por una operación que-y ficieren. Cualquier «lleenda urbana» qu’engrandara’l bon cartel que tenía. Recuerdo d’aquella dómina a otros lluchadores colos que compartía cartel: «Chausson», col so patín invertíu, una llave diabólica qu’emplegaba al final de los combates, cuando taba yá fartucu de llevales. «Mousset», que tamién yera asturianu y perdía siempre con Peltop. Uno mui «gochu» que se facía llamar «El Inca peruanu», que tiraba de los pelos y metía los deos nos güeyos del contrariu. «Ochando», que tenía una barrigona de Buda, pero nun había quién lu desplazara del suelu. «Saludes», valencianu… en fin, pa qu’empezaría.
Depués, Peltó, agora yá ensin p, dedicóse al somarinismu y a sacar chatarra del mar. Tamién a facer rescates. Y entovía-y dio tiempu pa estudiar, lleer y escribir con una finalidá mui nidia que se llamaba Asturies. Nun quiero facer una necrolóxica, namás recordar delles coses que me vienen a la memoria. Agora que me da la noticia de la su muerte’l que fue un de los sos meyores amigos: el cantautor Rafa Lorenzo, que nun podía esconder la so tristura, quiero da-y a él (a Rafa) el mio pésame, pola so gran amistanza. Y pal bonu de Peltop (asina quiero recordalu) desea-y «que la tierra-y seya leve».
(Na semeya, Peltó y Rafa Lorenzo)
LA RISA DE BENEDICTU.- Yá tenemos nuevu Obispu. Les males llingües que dicíen que los asturianos somos tan malos que nun merecíemos obispu nuevu, taben enquivocaes. Haylu. Llámase Jesús Sanz y, polo que dicen, xuega nel equipu de Rouco Varela. Espero que tamién nel de Xesucristo. Como ye llóxico, vamos da-y el marxen de tiempu que necesita enantes de dar una opinión sobre él. Al rodiu del nomamientu, quiero recordar qu’un grupu grande de cures asturianos unviaron, va tiempu, una carta al Vaticanu, pidiendo p’Asturies un obispu que conociere y respetare la nuestra singularidá. Ente ellos taba, porque por él m’enteré, el párrocu de La Calzada, Jose Mª Bardales.
Del destín de la susodicha carta nada se supo. Creo aldovinar que, cuando Su Santidá, ta triste o pesarosu por dalgún revés propiu del cargu, suel comenta-y al so secretariu: «Anda, sácame otra vez esa carta de los asturianos, que quiero poneme de bon humor».
TIRAR LES PERRES.- Nun sé qué privilexáu celebru acaba diseñar una campaña turística col lema: «Gijón. Asturias con sal». Y llueu, unes cuantes frases de les que llevanten a los muertos de la tumba. La campaña ye, como non, en castellán dafechu. Y lo más curioso ye que, dalgo que debería dir empobinao a atrayer xente pa Xixón y p’Asturies, fáese dientro del propiu Xixón, colo cual a los que queremos atrayer yá tan equí ensin falta campaña. Paez un traballingües pero ta mui nidio. Imaxinemos que’l Sporting quier llevar xente al so estadiu de fútbol. Y ocúrrese-yos llenar el Molinón de cartelos que ponen: «Hai que dir al Molinón». Coime, los que los lleen ye que yá tan ellí. Habrá que los poner fuera… Pues eso, les campañes pa promocionar Xixón y Asturies habra que les facer fuera ¿non? En cualquier casu, y a la vista los recortes en Cultura y demás que tán preparando, abúltame qu’estes campañes son perres tiraes. Yo, palo de «Gijón. Asturias con sal», apetezme ser hipertensu.
