CRUCERISMU.- Anden los políticos llocales de Xixón, les organizaciones qu’atropen a los comerciantes de la ciudá y dalgunos de los propios comerciantes a la caza del crucerista. Esa moda turística que principia a llegar a la costa asturiana y que dexa, mui de xemes en cuando, un puñáu de despistaos personaxes a los qu’atopes pela cai Corrida, pel Muru o pel Muelle cola so condición llantada na cara. Yo veo bien que, a esta xente, se-yos procure información y propaganda, y se-yos dean facilidaes pa llegar o marchar, pero resúltame un poco “aldeanada” tou esi paripé y rendevú que se traen a la so costa. Puestos d’información ambulantes, Feries d’Artesanía que s’entamen pa media docena paseantes, l’Autobusón Turísticu que ta paráu y hai que lu echar andar, tarxetes de descuentos pa nun sé cuántes coses… Igual too ta bien y hai mester de cazar al turista a llazu, pero visto dende fuera a min paézseme un poco como lo de “Bienvenido mister Marshall”, o igual meyor como lo de Shakespeare: “Munchu ruíu y poques nueces”.
SEVILLANES.- Ye un tema que siempres que lleguen estes feches, saco a rellucir: lo de la famosa Feria d’Abril de
Sevilla… en Xixón. Nun tengo nada que dicir en que’l que quiera, en guardando les formes, se divierta como-y pete. Con Sevillanes y rebujito (peme que s’escribe asina) o con pulpu y albariño. Faltaría más. Pero, la verdá, repúname abondo la propaganda de determinaos medios de comunicación que, pa lo nuestro, nun amuesen nin la metada d’interés. Dende va ya nun se cuanto, hai nos papelos anuncios a toa páxina coles maravíes andaluces y lo bien que se va a pasar. Bono, habrá que lo aguantar pese a que los verdaderos andaluces tampoco nun lo ven mui bien fuera de contestu (Carlos Cano dixit). Pero polo que nun habría que pasar ye porque s’empleguen perres publiques nesos festexos, mientres se “racanea” o se suspenden coses que cinquen a la nuestra cultura y la nuestra llingua. Y ye que, embaxo los anuncios de prensa, pue vese’l llogotipu del Ayuntamientu de Xixón y la collaboración del ente públicu “Teatru Xovellanos”. Y eso non, amigos.
ASTURIANISMU DESAPAECÍU.- Ye una entruga inútil y que, amás, siempres me pon de “mala lleche”. ¿Ú ta l’asturianismu políticu? ¿Cómo pue ser que, colo que fardamos d’Historia, de Cultura, de Llingua, de Vezos (toes con mayúscules) y col nuestru calter indómitu y lluchador nun tengamos nin la más mínima representación política asturianista? Galicia, Cantabria, Aragón, Valencia, Andalucía, Canaries… amás de, claro, País Vascu y Cataluña tienen, en mayor o menor midida, grupos políticos con representación parllamentaria que lluchen polo suyo, polo propio. Y equí, cualquiera que llega arrampla con votos nuestros. Agora fue “Podemos”, pero enantes hubo otros, como UPyD, que tien escañu parllamentariu. ¿Nun hai espaciu políticu pa un partíu asturianista o ye que lu nuestro ye namás de boca pa fuera? Sólo’l silenciu o l’afonía respuenden.
