BOYER.- Morrió’l que fue ministru d’Economía nel gobiernu de Felipe González, Miguel Boyer. Boyer yera un paisanu antipáticu, con pinta de señoritu de l’alta sociedá, y que finó casándose cola ex-muyer de Julio Iglesias, espeyu glamurosu d’esa alta sociedá. En cuantes al so llabor como ministru, fue un de los varios «socialistes» de triba lliberal que traxeron una reconversión selvaxe, sobre too p’Asturies, y la precariedá nel emplegu. La única fama que tuvo fue aquella famosa espropiación de Rumasa, que-y traxo unes inmerecíes simpatíes de la izquierda, que bien ceo s’encargó d’esbayar. La llóxica deriva ideolóxica arrastrólu murniamente hasta l’asociación d’Aznar y la derechona española, esa Fundación FAES de negra memoria. Nun voi a echalu de menos.
PUFOS SOCIALISTES.- Entovía siguen apaeciendo «pufos» de la época del gobiernu
socialista en Xixón. Esos seiscientos y pico mil euros qu’hai que pagar a una empresa de deportes -Forum Sport- a la que se-y negó un permisu d’apertura inxustificadamente. Llueu, el caradura esi de Martínez Argüelles diz que fue pa beneficiar a los pequeños comerciantes, cuando’l gobiernu asturianu del PSOE, y activamente a la cabeza don Tini Areces, concedieron más llicencies que nengún otru gobiernu pa qu’entraren a sacu les grandes firmes de supermercaos. Tenemos más grandes superficies que naide por metro cuadráu. Asina zarraron pequeños negocios a embute. Esti pufu vien a sumase a l’anulación del PGOU, al alquiler millonariu de naves pa los buses municipales, etc etc. Asina que polo menos, a agachar les oreyes y a callar.
EL CUENTU LA LLECHERA.- Asina denomó la Ministra de Fomentu, doña Ana Pastor, a toos esos planes de les víes organizaos por Xixón al Norte. Diben a sacar perres a manta, cola venta y urbanización de los terrenos lliberaos. Ceru patateru. Ta too fecho una llaceria, un llamorgal que mete mieu. Dalgunos diximos que too aquello de que Xixón taba dividíu en dos partes y había que lu xuntar yera un cuentu. Una disculpa pa dar trabayu a los constructores. Xixón taba perfeutamente comunicao, y entovía siguen les dos pontes (la que sal a Xixón Naval y la de más p’arriba de Moreda) dando serviciu peatonal y automovilísticu. Y yo siempres fui por Marques de San Esteban tan guapamente. A cambiu, lo que ficieron fue quitar el tren del Humedal, y esi serviciu sí que yera bonu, non como agora qu’hai que dir garralu a casa so madre, a les afueres del pueblu. Asina perdió los pasaxeros que perdió la Renfe (un viaxe a Uviéu comodísimu) y «la» Feve. En cualquier casu, la señora Pastor tien más cara que’l famosu sacu de perres, siempre prometiendo y nun dando, llevándolo too pa Galicia y escaqueándose cola Variante, cola Autopista del Mar y coles demás comunicaciones per tierra,mar y aire. Amás, por si nun lo sabe, el Presidente del Conseyu de Alminstración de la sociedá ye, na más y na menos que’l Secretariu d’Estáu d’Infraestructures y Planificación del Ministeriu de Fomento. ¿Suéna-y el cargu a la dueña de la llechera?
