VIOLENCIA MACHISTA.- Esti ye un tema pal que nun debiere haber UN «Día Internacional contra… » sinón que tolos díes debiéremos ser conscientes de la so esistencia. Quiciás los paisanos nun seamos a pescanciar, en tola so midida, lo destructivo que ye. Yo pidiría a los mios conxéneres que, como hai que facer siempres, ficieren un esfuerciu por ponese nel llugar d’una muyer maltratada. Que sintieren nel so propiu cuerpu los golpes, les bofetaes, la violencia física… La humillación d’esi tonu chulescu qu’empleguen los maltratadores, el despreciu… Si por un momentu, namás por un momentu, fuéremos capaces de ponenos na piel d’una muyer maltratada, entenderíemos meyor la llácara que supón esi maltratu y la condición de non-persona a la que se somete a la maltratada. Pienso na indignación y na roxura que m’entraría si daquién me tratare asina y siento verdaderu odiu por esos paisanos que nun merecen vivir en sociedá colos seres normales.
LA LLOCA QUEDÓ GÜÉRFANA.- Primero perdió a los fíos que colaron lloñe, y a los qu’eternamente ta despidiendo dende’l Rinconín, y agora
pierde a so padre, a la persona que-y dio’l ser. Tien de tar triste. Voi muncho a visitala, y nunca me presta más que cuando’l día ta buxu, y llueve, y a un éntra-y nel alma un sentimientu como’l qu’ella debe tener. Y nun sé si la xente lo sabrá, pero’l Día de la Madre, apaez siempre con un ramu de flores puestu al llau que igual-y llega de lloñe, de dalgún d’esos fíos que tuvo de marchar y dexó encargao que a so madre nun-y falten flores nel so día. Anque lo punxo’l periódicu, nun recuerdo agora cómo se llama l’escultor que-y dio forma. Pero llámese como se llame, prestaríame qu’hubiere tenido una vida bona, y una muerte digna. Tendré un recuerdu pa él la prósima vez que vaya a visitala.
LA MAFIA GRANADINA.- Ta dicho nel Evanxeliu: «Hai d’aquel qu’escandalizare a un d’estos guah.es. Más-y valiere atase una piedra de molín y tirase al agua…» Prestaríame, por un momentu, creyer qu’esiste Dios. Y que como bon Dios, cumple la so pallabra. Y que a esos fíos de puta de sotana y alzacuellu, y a los que nun los lleven pero collaboraron, ficiére-yos un castigu mayor que’l de la piedra de molín pa que pagaren les sos culpes. Sé que son una minoría ente los miembros de la Ilesia Católica, pero eso debería abastar pa que la institución como tal, perdiere esi tonu de «perdona vides» col que siempre nos trata, inclusive a los que nun somos creyentes. Y yá va siendo hora, ya lo va siendo, de que se revise esi Concordatu que concede a una ilesia que nun ye d’esti mundu, unos privilexos que sí son d’esti mundu. Yá va siendo hora.
JUAN GOYTISOLO.- Cellebro que-y dieren al segundu Goytisolo n’edá (José Agustín yá ta llamentablemente muertu) el prestixosu premiu Cervantes. Pásame con él lo que con dellos otros escritores, que me caen mui bien como persona, pero de los que nun soi a afondar na so obra. Home seriu -quiciás demasiao- siempres valoré n’él la so postura ética frente a la Dictadura, la so inflexibilidá intelectual, cuando otros munchos s’adautaron pa siguir medrando. Dende lloñe, ellí onde tuviere y onde viviere, fue de contino la voz d’una conciencia crítica, y caltener eso nel tiempu tien pa min munchu méritu. Bienveníu, pues, el premiu que-y dan porque sé qu’eso nun va a camudar un res la so actitú vital ya intelectual.
