OTRU NUEVU «CASCAZU».- La refuga de Francisco Álvarez Cascos a repitir como cabezaleru autonómicu, ye un nuevu «Cascazu» a los que yá nos tien avezaos el políticu xixonés. Alcordámonos, asina a voléu, del «cisma» con Marqués, el «cisma» col PP y la presidencia de la so candidatura, el «cisma» cola convocatoria de nueves eleiciones cuando dimitió a los siete meses de Presidente del Gobiernu Asturianu, y el «cisma» d’agora mesmo. Vamos, que si perteneciere a la Ilesia Católica taba ya nel Infiernu. Esta decisión camuda dafechu’l mapa políticu del País, pero yo nun m’atrevería a dicir en qué sentíu. Habrá qu’esperar a les urnes, si enantes nun hai pautos, xuniones, divisiones o retiraes, que tal y como tán les coses nun son de descartar. Quede equí recoyida namás, una nueva espantada d’un políticu que, al mio xuiciu, yá va tiempu que quier dir pa casa y nun sabe cómo. Descanse na paz política don Francisco.
UN ALTU’L FUEU QUE NUN VA A DURAR MUNCHO.- Acaba firmase en Minsk ente parte de les fuerces en conflictu. Otra parte son los ucranianos que quieren secesionase, los del Este del país. Y ye que les axencies de noticies occidentales xueguen coles pallabres como mou de tomar partíu. Los que dieron un golpe d’estáu, derrocando poles armes al presidente salíu de les urnes, son los buenos pa occidente, porque quieren pactar con ellos. Los que mayoritariamente lu apoyaren y nun se reconocen na forma de gobiernu nin d’estáu actuales, porque son d’orixe rusu, falen el rusu y tienen families en Rusia, son los malos. «Milicies pro-ruses», «Separatistes», «Sublevaos», «Cabecilles rebeldes»… frente a: Gobiernu Ucranianu, Exércitu Ucranianu, etc. Yá sabemos, la famosa llibertá de prensa occidental. L’otru día, una paisanina vieya que taba ente unes ruines recién bombardeaes en Donetsk por parte de los «buenos», dicía que defenderíen la so patria. Porque la so patria ye aquella, una Ucrania con llazos en Rusia. Total, que mientres nun se reconoza’l derechu a una autonomía dafechu a les zones d’orixe y llingua rusos, o se cree una república federal, les tensiones van siguir. Y l’altu’l fueu va a ser papel moyao.
LA ORDEN DE MALTA Y LOS SEÑORÍOS N’ASTURIES.- Presentáu pol catedráticu de la Universidá d’Uviéu, don
Narciso Santos Yanguas, dio una conferencia sobre esi tema el xixonés Emilio Dongil, premiu estraordinariu fin de carrera de la so promocción y activu investigador del nuestru pasáu asturianu. Anque’l tema nun se prestaba muncho a floritures, Dongil tuvo bien, falando de los dos Señoríos qu’hubo n’Asturies de la Orden de Malta, como auxiliu y defensa de los peregrinos que facíen el camín de Santiago pola ruta asturiana. El camín más antiguu de toos. El Señoríu más importante taba en Grao y yera’l de San Juan de Leñapañada, y l’otru, nel conceyu de Sieru y yera’l de San Juan de Arenas. Penriba de tolo que se dixo, hai dos coses que m’interesaron más, les toponimies. Nel Señoríu de Grao pagábense pocos impuestos, dos riales, o un balagarín de lleña. Ta claro qu’habia que pañar la lleña pa pagar l’impuestu, y d’ehí lo de «Leñapañada», que de xuru que sería «Lleñapañada». La curiosidá del otru topónimu «de Arenas», en Sieru, llevóme a recordar que, precisamente, la mio familia paterna vien d’un sitiu de Sieru que pertenez a Carbayín Altu, y que se llama «Areñes», anque los finos dicíen «Arenas». Nun sé si tendrá que ver col mesmu topónimu del Señoríu. En cualquier casu, una charra interesante.
