close
«Piquinu», un perguapu documental

«Piquinu», un perguapu documental

2013-01-26364Visitas

Un migayín por casualidá tuvi la ocasión de ver el documental «Piquinu», de Sonia Fernández. Un documental que recueye un tema tan simple como un paséu pel monte d’un rapaz de 13 años, Aarón, que mientres camina, va falándonos de les coses cencielles de la so vida. Los perros, la caza, les vistes… Y too ello, cuntao con esa guapísima fala de la zona, cola so «ché» y les sos metafoníes que’l rapaz domina como tolos collacios de la tierra, d’esi pueblu de Rospaso nel conceyu de la Pola L.lena.

El gran aciertu del curtiumetraxe ye que  la direutora, el cámara, la música y tolos demás elementos que conformen el documental, nun pretenden destacar nin llucise p’algamar «rellumbrón», sinón que tán puestos al serviciu de la historia, a acompañar al rapaz nel so paséu pela rodiada del pueblu, pelos maxestuosos paisaxes que columbra. D’esti mou, una historia cenciella, ta cuntada de forma tamién cenciella, produciendo nel espeutador (polo menos en mi) una impresión de frescor y tenrura que lu va a dexar durante un tiempu pensatible. Recordando lo qu’acaba ver.

Norabona, pues, a tol equipu que fizo posible esta «piquina» obra d’arte, que tendría de ser vista en toles escueles d’Asturies. Y tamién en toles Conseyeríes del Principáu, a ver si por fin yeren a da-y valir a esa cosa tan guapa, y tan escaecía por ellos, como ye la nuestra cultura y la nuestra llingua. Nin meyor, nin peor: La nuestra. Pero paezme que diba a ser como llava-y la cabeza a un burru: gastar tiempu y champú.
(Ver vidiu en: PIQUINU on Vimeo)

 

Leave a Response