Toi dafechamente d’alcuerdu col planteamientu del sindicatu de la enseñanza SUATEA sobre la nuestra llingua, al respective de les declaraciones de la Conseyera d’Educación, polo que nun voi repitilu nesti blogue. Pero, amás, la murnia Llei d’esi paisanu apellidáu Wert, nun sólo perxudica fondamente al pueblu asturianu, dexando a la llingua peor parada de lo que taba nel circuitu educativu, lo que yá «manda madre», sinón que tamién dexa fuera otros munchos temes d’enorme importancia pa la formación de los neños y rapazos. O seya, los que van a recoyer el relevu social y políticu nun futuru inmediatu. Asina temes como la igualdá ente homes y muyeres, la violencia de xéneru, el racismu, la homofobia o la probeza, y en xeneral tolo rellacionao colos Derechos Humanos, paecen nun tener importancia pa esti gobiernu que yá nun ye que seya «tecnócrata», sinón que ye invidente. Los rapazos/es necesiten tener unes pautes, una formación, al rodiu d’estos temes tan trescendentes nes sociedaes actuales si nun queremos que la nuestra seya una sociedá racista, machista y homófoba. Camín vamos d’ello. «Amnistía Internacional» ta trabayando nesti sen, pidiendo que s’unvíen cartes al Ministru d’Educación esixendo la entrada de los Derechos Humanos nos conocimientos escolares. El vidiu que pongo más alantre, ye una de les actividaes qu’esa prestixosa organización ta entamando pelos colexos ya institutos. Paga la pena velu y concienciase de lo qu’aporta.
