«Cuando hai una guerra, la primer víctima ye la verdá«. Ye ésta una fras tópica y, como tal, suel tener una basa de razón. Y eso ocurre, amás, nun sólo nos conflictos dafechamente bélicos, sinón tamién n’otru tipu de guerres que nun necesiten armes.
La situación de crisis que ta atravesando España (y Europa tamién, pero eso nun ye consuelu) ye d’una gravedá enorme, a tal puntu que nun se ye a ver la salida, polo menos a un mediu plazu d’unos años. Dende llueu nun hai recetes máxiques pa salir d’ella, anque da la impresión, y asina lo manifesté n’otres ocasiones, que los remedios que se vienen aplicando lo que faen ye agravala. El Partíu Popular presentóse a les últimes eleiciones con una riestra de promeses que va incumpliendo una tres otra. Nun fai falta repitiles porque son de toos conocíes: impuestos, recortes n’educación, sanidá, etc. A ver lo qu’aguanten ensin xubir el IVA, que yera l’últimu abellugu que-yos quedaba por tocar. Y eso que queríen comencenos de que too yera un problema d’imaxen y de confianza, y qu’abastaría con echar a los socialistes y ponese ellos, pa que les coses principiaren a meyorar. Ya se ve cómo acertaron.
Agora, como esiste una incapacidá real d’atayar la crisis, lo que pretenden facer, aprovechando esa mayoría que-y dieron les urnes, mayoría que votó engañada por un programa «tramposu» (porque faen lo contrario de lo que dicíen), ye intentar controlar la información. Si nun podemos meyorar les coses, contémosles d’un mou más favoratible. Esa ye una tentación que tienen tolos gobiernos, pero que sólo los más democráticos, o los que tienen delantre un poder que los seya a controlar, eviten cayer n’ella. Un d’esos poderes de control, ye la prensa. Y con ella una información puntual, veraz, ensin manipulaciones. Ye cierto que tampoco la prensa ye independiente dafechu, pero ye lo más parecío a un control, fuera de lo que ye un Parllamentu controláu por mayoríes absolutes.
Los servicios informativos de Televisión Española vienen desendolcando un importantísimu llabor y tienen, nesti
momentu, un prestixu d’imparcialidá que los fizo ganar dellos premios y, lo que ye más importante, el reconocimientu dientro y fuera d’España. Un poco na llinia de la BBC, o seya, pasar de ser de la televisión del gobiernu, a ser la televisión pública del estáu. Equipos como’l d’Ana Pastor, colos «Desayunos…», los telediarios, y los documentales de la 1 y de la 2, formen un paquete informativu de primer calidá que vienen informando, abúltame qu’ensin engañifes, de lo que ta pasando, y dando la voz a aquellos otros coleutivos que son los que más sufren el desamparu.
Y claro, eso ye dalgo qu’un gobiernu que ta «al pairu», pero que cunta con mayoría absoluta nun pue consentir. Poro, en llugar de pautar col restu de los grupos políticos una persona de consensu pa dirixir la televisión pública, cambien vergoñosamente les regles del xuegu y asoleyen un decretu-llei pol cual, en llugar de los dos tercios de la Cámara pa consiguir el nomamientu, abasta cola mayoría absoluta, qu’ellos tienen sobradamente. Nun sé, a estes hores, si podrá haber dalgún alcuerdu d’última hora pautáu colos grupos de la oposición, pero la impresión que da ye que’l PP, yá que nun atopa remediu contra la crisis, lo que va a facer ye poner al frente de la información a una persona que la remane a la so satisfaición. Ye una pena, porque’l grupu de bonos profesionales que faen agora esa información nun lo merecen. Y muncho menos nosotros, los espeutadores. La xente que sufrimos esta crisis galopante y que, polo menos, merecemos que los que nos manden nos dean una información cierta y puntual. Con un Urdaci ya tuvimos bastante.
Post Data.- Hores depués de colgáu esti comentariu dan los periódicos la noticia de que’l nuevu direutor del Ente Públicu va a ser Leopoldo González-Echenique, arreyáu al ínclitu Aznar del que fue direutor xeneral. O seya, un home «neutral». Pola so parte los del PSOE, pa nun «collaborar», renuncien a los sos conseyeros. Fallu onde los haya: piérdese la oportunidá de tar informáu, colo importante que ye. Piérdese la oportunidá de llevar al conseyu la voz de la xente y les crítiques propies y del pueblu. Y piérdese la oportunidá de vetar dalgunes resoluciones que precisen una mayoría cualificada. Los partíos políticos nun deberíen tener «pataletes».
