Nel periódicu una fueya entera, de pagu, anunciándolo. Más tres o cuatro reportaxes, comentándolo. Promuévenlo, el diariu El Comercio, El Teatru Xovellanos del Ayuntamientu de Xixón, Cámara de Comerciu y delles firmes comerciales. El llugar: El Recinto Ferial Luis Adaro xixonés. Y l’anunciu promete «paseos en calesa andaluza», «tablao flamenco», «tapeo, rebujito, manzanilla, cañas… y mucha música». Sevillanes y Rumbes. Concursu de sevillanes infantiles. Cante, guitarra y bailes flamencos. Misa rociera…. y dalgunes coses más que nun quiero echar más tiempu n’esmenuzar. Esta ye la Feria de Abril, que se fai en xunu, de Xixón. Nun tengo nada que dicir de too ello, a nun ser qu’haya perres públiques asturianes pel mediu. Porque taría bono que se quitaren les subvenciones pa les asociaciones culturales asturianes, y se financiere, na midida que fuere, dalgo d’esti estilu. Al marxe d’ello, ye verdá que me da muncha grima esta «Asturies rociera», pero tamién dende l’otru llau siéntese dalgo igual. Quiero dicir que los verdaderos andaluces tamién refuguen d’esti tipu de copies, fuera de contestu, que pretenden asonsañar, con farolinos y sevillanes, a la verdadera alma andaluza. L’inimitable Carlos Cano, llantólo nuna simpática y al tiempu murnia sevillana, na que se coña d’esos foriatos que pretenden copiar lo suyo, diendo a l’academia a aprender sevillanes como si fueren a sacar el carné de conducir. En vez de facer más comentarios, ufiértovos la prestosa «Sevillanas de Chamberí» de Carlos Cano.
