Estuve esti día na concentración de la «Xunta Pola» delantre’l Parllamentu. El lema yera «Pola Dignidá del Asturianu». Coincidióme con un estáu febril gordu y, la verdá, tuvi que facer un gran esfuerzu pa dir dende Xixón. La deceición fue mayúscula pues nun tábemos más d’unes docenes de persones y la impresión que yo llevé fue bastante probe. Entiendo que la hora nun yera buena -les cinco de la tardi- pero con eso y con too abúltame que la xente del asturianu nun ye consciente de lo que se ta xugando. Siempres fue difícil la cosa, pero nunca ningún políticu n’Asturies s’atreviere a tal despreciu a la llingua como’l protagonizáu pola Presidenta del Partíu Popular. Nun se facíen coses, pero había un mínimu respetu pa nosotros, los falantes y escribientes del asturianu. Teníemos el nuestru «rinconín del bable» pero dientro d’él había un ciertu respetu. La entruga, entós, ye: ¿qué tienen que facer los políticos, o en dalgunos casos la prensa, pa que respondamos toos a una?. ¿Nun dicimos que somos tantos y cuantos y que’l nuestru idioma maternu ta a piques d’esapaecer? Pues hai que dar la cara, nun val con escondese embaxo les 
faldes de la Unesco o del Conseyu d’Europa. Si tamos esperando a que vengan ellos a solventanos la papeleta vamos aviaos.
La única sonrisa que me llevé a los llabios fue protagonizada por un perru. Llevaba al llombu una bandera asturiana y en cuantes que vio a la pita de la Xunta, salió lladrando detrás d’ella y, de nun ser porque l’amu lu llevaba bien atáu, nun sabemos lo que-y ficiere a la probe pita. Pa min que lo de la bandera asturiana yera un disfraz y en realidá yera un perru amaestráu del PP. Pero bueno, prefiero nun dar pistes. En cualquier casu y viendo los que yéremos, Mercedines pue dormir tranquila.
