close
«Una proposición indecente»

«Una proposición indecente»

2014-08-14640Visitas

redfordrobert01Emplego’l títulu de la película de Robert Redford y Demi Moore, quiciás de forma desaxerada, pa facer un pequeñu comentariu al rodiu de la proposición qu’Izquierda Xunida fizo a Podemos (y a esi ente gaseosu que se llama Equo), nel sen d’una gran coalición d’izquierdes que pudiere gobernar en Xixón, n’Asturies, n’España y, seguramente, nel restu la Galaxia.

Ye una táctica que yá fiede un poco esa del grupu I.X. de querer coaligase con cualquier cosa que se ponga a tiru, con tal que tea de moda. Da igual que seyan los Verdes, los Ecoloxistes, los “movimientos ciudadanos”, les plataformes contra esto o a favor d’aquello y hasta “colos del Bable”, como yá ficieron otres veces como con aquel grupu lideráu por Rafa Palacios. Yá comenté en dalguna otra ocasión esa esmolición de tar a dambos llaos de la frontera: nel Gobiernu (que seya), y nes barricaes. Firmando nos despachos oficiales, y calteniendo arguta la pancarta. Y yo creo que tien d’haber un tiempu pa cada cosa. Si creemos que podemos tar nel Gobiernu (que seya) porque ehí vamos facer un llabor positivu pa los ideales que defendemos, faigámoslo, pero con toles sos consecuencies, asumiendo esi llabor y dexando les critiques pa los de fuera. Y si nos paez que dende les esferes oficiales nun podemos aportar nada, y amás tamos a la escontra de lo que se ta faciendo, llevantemos la pancarta de la protesta, pero dexemos la pluma de los decretos en manes d’otros. Les dos coses non. Nun ye ético.

Por eso, agora que les encuestes dan un númberu creciente de votos al grupu Podemos, apresúrense dende Asturies a llanza-yos una proposición, non de llei, pa gobernar xuntos nestes tierres norteñes dexaes de la man de Dios (y de los homes), y eso paezme mui poco serio. Y paezme poco serio por un par de coses. La primera porque, precisamente, el grupu surdíu de los “indignaos” lo primero que denunció ye a los partíos clásicos, anquilosaos, acomodaos, ayenos a la democracia y a les bases, que tienen les vieyes zunes que nos traxeron hasta equí, hasta esta Asturies y esta España que ta tocando fondu en cuantes a drechos perdíos y xente pasándolo mal. Ya Izquierda Xunida ye un d’esos partíos. Un partíu que gobernó en Xixón y n’Asturies xunto col PSOE munchos años, y cuando nun gobernó fizo los pautos necesarios pa qu’aquellos gobernaren. Nun quiero dicir que durante esi tiempo too fuere malo, claro que non, sólo quiero dicir qu’ellos –I.X.- fueron parte d’esos partíos clásicos que Podemos (con razón o ensin ella) refuga.

Pero ye que, amás, la Izquierda Xunida d’agora mesmo ye una coalición en cata d’ideoloxía, de dirixentes, de mensaxe, deizquierda xunida referentes. Dividida en sucesives divisiones, dende fuera nun sabemos quién son unos y quién otros. Qué defenden unos y otros. Quiénes son los “buenos y los malos”. Quién denuncia y quién resulta denunciáu, y sobre too, por qué. Que neses condiciones traten d’atrayer al so rueldu a Podemos abúltame como lo del títulu: “Una proposición indecente”. Porque, ¿con cuál de los grupos de I.X negociaríen? Y ¿al rodiu de qué premises, de qué intereses, de qué dinámiques polítiques y sociales? Tengo mui bonos amigos que militaron y que militen n’I.X. y anque nun tenga nenguna autoridá pa ello voi da-yos un conseyu: En llugar d’apuntase a tolo que se mueve con más o menos aciertu perehí, que lluchen por llegar a discusiones intelixentes, a pautos, a acuerdos internos al marxe de personalismos y malos modos, ya igual, cuando consigan tener un grupu seriu y unificáu les sos proposiciones puedan ser creyibles.

Leave a Response