Tragué un bon cachu de la última serie de la Tele que se llama dalgo asina como «Debate del estado de la nación», que conforma la mio opinión de que nun me da más poles series españoles. Nun sé si ye que tengo a los actores mui vistos, pero’l casu ye que me paez que son toes iguales y que los vieyos actores siempres dicen lo mesmo. Cambien de traxe o de corbata, pero siguen siendo los mesmos perros con otros collares.
Esta última serie, na que’l protagonista yera esi Mariano Rajoy, más vistu que’l Tebeo, el malu yera un actor nuevu, que venía mui recomendáu, pero que nun acabó de prestame muncho. Ye d’esa escuela d’actores que trabaya con «muletilles» o frases feches, que repite a lo llargo la so actuación («… y usté lo sabe», o coses asina) y daba la impresión de que tuvo que lu axudar «l’apuntador» del teatru, porque se-y escaecía’l guión.
Cuenten que l’actriz Aurora Bautista sobreactuaba demasiao nos sos papeles. Un día, principió l’ensayu d’una obra diciendo con tonu melodramáticu: «¡¡¡Ramón!!!» El direutor mandóla parar y díxo-y: «Por Dios, Aurora, que todavía no pasó nada».
Sintiendo falar ayer a Rajoy y a Sánchez, n’aburrida telenovela ambientada nel congresu, petecía dici-yos viendo la so sobreactuación d’actores mediocres: «Por Dios, señores, qu’entovía nun pasó nada«.
